瞬間看地球衛星版 – World Wind

呢之前幾日0係某討論區見到有人介紹一套美國太空總署寫既 software World Wind,可以一次過睇晒全球既衛星圖片,仲可以由成個地球開始係咁 zoom 落去睇,好似好正咁。結果就 download 左,只不過呢幾日忙緊 group project,冇時間玩0者。今日終於做好左 demo,可以裝黎試下喇。

首先一開始就會睇到成個地球(呢幅係我揀既夜間圖片,睇下日本,台灣同香港幾光…),用家可以用滑鼠郁黎郁去調教角度,而如果隻 mouse 有轆的話,仲可以用黎 zoom in/out 添。然後不段 zoom in zoom in zoom in 落去呢,就會轉左用另一枚衛星睇較為精細既圖片。首先呢,去香港先。

香 港。呢幅就係我老家喇。大家可以清楚咁睇到舊啟德機場跑道,九龍半島,大帽山,維多利亞港等等香港既標誌。如果 zoom 近 D 仲望到我屋企隔離個馬場添。另外,有別於一般衛星圖片,呢個程式結合左兩個 program 既資料,除左基本既顏色之外(PS: 呢幅圖用左電腦加工顏色,所以 D 綠色係咁),仲會以 3D 既方法表示地型,即係話你可以0係九龍東望過去獅子山(座山真係突左出黎架),又或者掉番轉試下0係屯門望唔望到獅子山…

此外仲有粒美國既衛星專影美國大城市既相。呢個就勁好多喇,因為解析度高(1 pixel = 0.5 metres),所以 zoom 到盡的話連車都睇到(人睇唔睇到就睇你對眼喇)。呢幅係彩圖,仲有地名提供添 (不過多到堆埋一舊…)。

結果呢,今日番到黎之後就0係度用呢套 software 不斷搵地標,好似富士山呀,巴黎鐵塔呀,金字塔呀,千禧巨蛋呀…… 咁樣就可以安坐家中免費環遊世界,真係幾正。

不 過最衰既係我仲未用到佢0個套天災預警系統(可以用黎睇天災,好似大火,沙塵暴咁),話說有 bug…. 希望下一個 version 快 D fix 好就好喇。呢個 version 除左免費,仲係 open source,如果你精於 C# 同 Direct X 呢,不妨 download 落黎研究下… 至於好似我呢類唔識既,download 落黎玩下啦。

Leave a Reply

Your email address will not be published. Required fields are marked *